नेकपा (एमाले) का तर्फबाट कैलाली निर्वाचन क्षेत्र नं. ४ का प्रतिनिधि सभा सदस्य उम्मेदवार लेखराज भट्टले आफ्नो चुनावी प्रतिबद्धता पत्र सार्वजनिक गरेका छन् । बिहीबार अत्तरियास्थित आफ्नै निवासमा आयोजित पत्रकार सम्मेलनमार्फत उनले आगामी कार्यकालका लागि विकास, स्थायित्व र समृद्धिको मार्गचित्र प्रस्तुत गरेका हुन ।

​भट्टको प्रतिबद्धता पत्रमा विशेषगरी शिक्षा, स्वास्थ्य, कृषि, औद्योगिकीकरण र भौतिक पूर्वाधारलाई उच्च प्राथमिकतामा राखिएको छ। ​शिक्षा क्षेत्रको सुधारका लागि सामुदायिक विद्यालयको गुणस्तर वृद्धि र प्रविधिमैत्री शिक्षण प्रणाली अपनाउने प्रतिबद्धता पत्रमा उल्लेख छ।
यस्तै शिक्षक तथा कर्मचारीहरूको सेवा–सुविधामा सुधार, पेशागत सुरक्षा र उनीहरूलाई सामाजिक सुरक्षा कोषमा आबद्ध गराउने योजना अघि सारिएको छ।

​आधारभूत स्वास्थ्य केन्द्र र शहरी स्वास्थ्य क्लिनिकहरूमा विशेषज्ञ सेवा विस्तार गर्ने, आवश्यक उपकरण र जनशक्तिको उचित व्यवस्थापन गर्ने लक्ष्य राखिएको छ। महिला, बालबालिका र ज्येष्ठ नागरिकलाई लक्षित गरी गुणस्तरीय स्वास्थ्य सेवा र स्वास्थ्य बीमालाई प्रभावकारी बनाइने तथा ​कृषिलाई व्यावसायिक बनाउन आधुनिक प्रविधि, उन्नत बीउ, मल र सिँचाइ सुविधा विस्तार गर्ने भट्टको योजना छ।

स्थानीय उत्पादनको संरक्षणका लागि शीत भण्डार निर्माण र उचित बजार व्यवस्थापनमा पहल, औद्योगिक कोरिडोरको विकास र सीपमूलक तालिममार्फत दलित, पिछडिएका र विपन्न नागरिकलाई आत्मनिर्भर बनाउँदै रोजगारीका अवसरहरू सिर्जना गरिने प्रतिबद्धतामा उल्लेख छ।

​यसका साथै ​कैलाली-४ को भौतिक स्वरूप बदल्न सडक, पुल, तटबन्ध, विद्युतीकरण र स्वच्छ खानेपानीको व्यवस्थापनलाई तीव्रता दिने भट्टले बताउनुभयो। साथै, धार्मिक स्थल र सांस्कृतिक सम्पदाको संरक्षण गर्दै होमस्टे र संग्रहालयमार्फत पर्यटन प्रवर्द्धन गर्ने योजना पनि समेटिएको छ।

​प्रतिबद्धता पत्र सार्वजनिक गर्दै नेता भट्टले भने,… “कैलालीको समग्र विकास र राजनीतिक स्थायित्वका लागि एमालेको जित आवश्यक छ। मैले अघि सारेका यी योजनाहरू केवल कागजमा मात्र सीमित रहने छैनन्, यिनको पूर्ण कार्यान्वयनमार्फत यस क्षेत्रलाई समृद्ध बनाउने मेरो अठोट छ।”
​उनले आफ्ना योजनाहरू कार्यान्वयनका लागि पुनः निर्वाचित गराउन मतदाताहरूसँग अपिल समेत गरेका छन ।